- SAKON KHUDUBAR JUMU'AH DAGA MASALLACIN MANZON ALLAH (SAW) DAKE MADINAH DAGA :: Esinislam Hausa Mediya Da Labari, Dandali Forums, Shafi, Rediyo Audios Talabijin, Bidiyo, Jaridu, Mujalloli, Labari Maƙalolin, Fatwas Addinin Musulunci, Suna Koyarwa Don

SAKON KHUDUBAR JUMU'AH DAGA MASALLACIN MANZON ALLAH (SAW) DAKE MADINAH DAGA BAKIN SHEIKH ABDULMUHSIN BN MUHAMMAD AL-QASIM (HZ) A YAU RANAR

ISA ALI IBRAHIM PANTAMI

Limamin a ranar wannan Jumu'ah yayi Khudubar ne akan "ILMI, DARAJARSA DA MATSAYIN MA'ABOTANSA." Ga sakon kamar haka 1) Babban limamin ya fara da al-Khudubatul-Hajah, wacce itace khudubar da Annabi (SAW) yake fara wa'azi ko huduba da ita.

Tana karantar da kadaita Allah, da nuna shiriya ta Allah ne, kuma ribar rayuwa na cikin Taqwa.

2) Sannan Limamin yayi umurni da "Taqwa" wato cikakkiyar biyayya ga Allah (SWT). Domin Taqwa itace hasken da ake gani da shi, kuma Taqwa ke rayar da zuciya. Allah yana cewa: "Lalle wanda yafi daraja gun Allah shine wanda yafi Taqwa." 3) ILMI DA TAQWA ke shiryar da bawa zuwa ga MahaliccinSa.

Domin da ilmi da Taqwa ake banbancewa tsakanin HALAL da HARAM.

4) Ma'abota Ilmi da su ake samun shiriya. Imam Ahmad Bn Hambal (RH) yana cewa: "Mutane suna da bukatar Ilmi fiye da abinci. Domin abinci akan bukace shi ne sau 2 ko sau 3 a wuni, amma ILMI ana bukatarsa a kowane lokaci a kowace rana." 5) Allah ya siffata kan Sa da ilmi. Allah yana cewa: "(Allah) ya ilmantar da mutum abun da bai sani ba." 6) ILMI HIKIMA CE, da Allah ke baiwa bayinSa. Allah yana cewa:

"Yana bada hikima ga wanda ya so, duk wanda aka ba shi hikima, hakika an ba shi alheri mai yawa." 7) Allah ya fifita dan Adam da ilmi akan Malaa'ika. "Wa 'allama Adamal Asma'a kullaha thumma arabhahum alal Malaa'ikati....." 8) Allah ya bawa Yusuf (AS) ilmi. Allah yace: "Lokacin da ya kai karfinsa, mun ba shi hukunci da ilmi." 9) Allah ya daukaka darajar wasu Annabawa sosai kuma ya bayyana cewa ya ba su ilmi. Daga cikinsu, akwai Musa, Is'haq, Daud, Sulayman, da Isa (AS).

10) Duk da darajar Annabi Musa (AS) yaje wajen Khidr neman ILMI kamar yadda Qur'ani ya bayyana cikin Suratul Kahf. (Wannan ke bayyanawa cewa DARAJA ko daukaka ba sa hana neman ilmi).

11) Qissar Annabi Sulayman a Suratun-Naml ta karantar da mu cewa, lalle mai Ilmi yafi mai karfi da bai da ilmi. (Kamar yadda Qur'ani ya nuna mana cewa, Aljanin da ke da "Ilmun Minal Kitaabi" yafi "Ifritu" da ke da karfi, samun nasara wajen ayyuka).

12) Allah ya karantar da mu cewa shi ya ILMANTAR da Annabinmu (SAW). Allah SWT yana cewa: "Ya ilmantar da kai abun da ba ka sani ba. Lalle falalar Allah akan ka mai girmace." 13) Annabi (SAW) bai nemi karin wata ni'imah ba a duniya sai ILMI.

Yana adduah da cewa: "Rabbi zid niy ILMA." 14) Annabi (SAW) yana cewa: "Malamai magada Annabawa ne.

Kuma Annabawa ba su gadar da zinare ko azurfa ba, sai dai sun gadar da ILMI...."(Tirmizhiy ya ruwaito).

15) Allah ya nuna darajar shaidar masu ilmi. Allah yana cewa: Allah yayi shaidar babu abun bautawa da gaskiya sai Shi, haka Malaa'iku da ma'abota ilmi, cewa Allah yana tsaye da adalci." 16) Allah ya nuna mana cewa Malaman (gaskiya) sune masu tsoron Allah.

17) Masu daraja idan sun nemi ilmi wannan na kara musu daraja.

Annabi (SAW) yana cewa: "Zababbunku a jahiliya su ne zababbunku a musulunci idan sun fahimci addini." 18) Ba'a samun ingantacciyar Aqeedah da Ikhlasi dole sai da ilmi.

Allah yana cewa: "Ka sani babu abun bautawa da gaskiya sai Allah." 19) Darajar mai ilmi bata zama daya da darajar jahili.

20) ILMI HASKE NE. Allah yace: "shi (ilmi) ayoyi ne bayyanan nu a cikin zukatan wadanda aka bawa ilmi." 21) ILMI SHI YAKE DAIDAITA HANKALI. Allah yace: "Wadancan misalai ne muke bugawa don mutane, amma babu masu hankalta sai masu ilmi." 22) ilmi ya halatta ayi tsere-tsere cikin neman sa.

23) Hanyar ilmi, hanya ce ta Aljannah. Annabi (SAW) yana cewa:

"Duk wanda ya kama hanya don neman ilmi, Allah ya sauwake masa hanyar zuwa Aljannah." (muslim ya ruwaito)
24) Imam Malik RH yana cew: "ilmi kariya ne daga FITINTINU." 25) Annabi (SAW) yana cewa: "Ku isar da ga gare ni, ko aya daya." 26) Allah ya umurce mu, mu rika tambayar masu ilmi kan kowace matsala.

27) Annabi ya kan yi adduah ga duk wanda yake so, da Allah ya kara masa ilmi. Kamar yadda yayi wa Abdullahi bn Abbas (RA)
adduar Allah ya kara ma sa fahimtar addini.

28) Allah yana daukaka masu ilmi da imani.

29) Annabi (SAW) yana cewa idan mutum ya mutu, duk ayyukansa sun yanke amma ban da guda uku, daga cikinsu akwai ilmi mai amfani.

30) Mafi girman Ilmi shi ne ilmin sanin Allah, da sunayenSa da SiffofinSa, da kadaituwarSa.

31) Duk lokacin da ilmi ya karu, daraja tana karuwa.

32) Malamai sune kan gaba wajen sanin Allah (SWT).

33) Girmama Malamai (na kwarai) wani bangare ne na addini.

Saboda sune Waliyan Allah kamar yadda Imam Shaafiiy RH yake fada.

34) Allah yayi umurni da yiwa AnnabinSa salaati. (Allahumma Salli ala Muhammadin, wa ala..)
35) Ya Allah ka kara yarda da Abubakar, da Umar, da Uthman da Aliyyu da sauran Sahabbai (Radhiyal Lahu Anhum ajma'in).

36) Allah ka taimaki Musulunci da Musulmai.

37) Allah ka albarkaci garuruwanmu kuma ka kara mana wadata.

38) Allah ka gyara kasashen dake cikin Fitintinu da damuwa.

39) Yaa Allah ka datar da Shugabanmu cikin yin dai dai, Yaa Allah ka datar da shi cikin aiki da littafinKa da Sunnar AnnabinKa (SAW).

Yaa Allah ka taimaki sojojinmu kuma ka basu ikhlasi.

40) Yaa Allah ka shayar da mu ruwan sama.

41) Yaa Allah lalle mun zalunci kawunanmu, idan ba ka gafarta mana ba, kuma baka mana rahama ba, zamu kasance cikin masu asara, Yaa Allah ka bamu ikon aiki da khudubar, Yaa Allah ka amsa mana addu'o'inmu,....